Big tiger : ఆదిలాబాద్ జిల్లాలో పెద్దపులి కలకలం

Big tiger

Big tiger : ఆదిలాబాద్ జిల్లా బోథ్ మండలంలో పెద్దపులి తిరుగుతుండడం కలకలం రేపుతోంది. మండలంలోని బాబెర గ్రామానికి చెందిన రైతు జాదవ్ దిలీప్ నేరేపల్లె గ్రామ సమీపంలో భూమిని కౌలుకు తీసుకొని సాగు చేస్తున్నాడు. బుధవారం (అక్టోబరు 23) సాయంత్రం ఎద్దును తన పొలంలో కట్టేసి, పంటకు మందు స్ప్రే చేస్తున్నాడు. ఆ సమయలో పెద్దపులి అక్కడకు వచ్చి ఎద్దుపై దాడి చేసి చంపింది. గమనించిన రైతు జాదవ్ దిలీప్ కేకలు వేయడంతో చుట్టుపక్కల రైతులు అక్కడకు వచ్చారు. అప్పటికే పులి రేండ్లపల్లె గ్రామంలోకి వెళ్లింది.

దీంతో భయాందోళనకు గురైన గ్రామస్థులు గ్రామంలోని పలు చోట్ల మంటలు వేసి, గుంపులు గుంపులుగా తిరిగారు. మరోవైపు చింతగూడ గ్రామ సమీపంలోని పొలంలో సైతం పెద్దపులి అడుగులను అటవీశాఖ అధికారులు గుర్తించారు. వజ్జర్ అటవీ ప్రాంతంలో పెద్దపులి సంచరిస్తోందని, పశువుల మేత కోసం అటవీ ప్రాంతం వైపు ఎవరూ వెళ్లొద్దని అధికారులు హెచ్చరించారు.