Pedalanka: పెదలంకలో కొట్టుకుపోయిన 300 పాడి గేదెలు

Pedalanka: కృష్ణా నది సమీపంలో లంక గ్రామాలు పూర్తిగా వరద నీటిలో మునిగిపోయాయి. రాయపూడి పెదలంకలో సుమారు 300 పాడి గేదెలు వరద నీటిలో కొట్టుకుపోయాయి. ఇప్పటి వరకు సుమారు 300 మంది ప్రజలను ఎన్టీఆర్ జిల్లా ఇబ్రహీంపట్నం పునరావాస కేంద్రానికి తరలించారు. ఇంకా 70 మంది బాధితులు పెదలంకలోనే ఉన్నారు. వారంతా ఇళ్లపైకి ఎక్కి సాయం కోసం అభ్యర్థిస్తున్నారు. హెలికాప్టర్ల ద్వారా వారిని సురక్షిత ప్రాంతాలకు తరలించేందుకు జిల్లా యంత్రాంగం చర్యలు చేపట్టింది.

కృష్ణా నదిలో వరద ఉధృతి కారణంగా మంతెన సత్యనారాయణ ఆశ్రమం సమీపంలో కరకట్టకు ఉన్న గేటు వద్ద నీరు లీకవుతోంది. ఆదివారం అర్ధరాత్రి ఆ ప్రాంతాన్ని మంత్రి నిమ్మల రామానాయుడు, ఎమ్మెల్యే తెనాలి శ్రవణ్ కుమార్, సీఆర్డీఏ కమిషనర్ కాటంనేని భాస్కర్ పరిశీలించారు. సుమారు 5 గంటల పాటు వరద నీటిని అరికట్టడానికి అధికారులు, స్థానికులు తీవ్రంగా శ్రమించారు. కాని మళ్లీ లీకేజీ ప్రారంభమైంది. సోమవారం ఉదయం కరకట్ట వద్ద వరద నీరు లీకవుతున్న ప్రాంతాన్న సీఆర్డీఏ అధికారులు పరిశీలించారు. కంకర వేసి వరదను అరికట్టాలని సిబ్బందికి సూచించారు.