Balagam Venu : సక్సెస్ కొట్టినా ద్వితీయ విఘ్నం దాటని బలగం వేణు

Balagam Venu

Balagam Venu : ప్రొడక్షన్ బాయ్ నుంచి  దర్శకుడి దాకా అన్ని అనుభవాలు ఎదుర్కొన్నాడు యెల్దండి వేణు అలియాస్ బలగం వేణ అలియాస్ జబర్దస్త్ వేణు. జూనియర్ ఆర్టిస్టుగా, కమెడియన్ గా, జబర్దస్త్ టీమ్ లీడర్ గా, హీరో ప్రెండ్ క్యారెక్టర్లు, సపోర్టింగ్ రోల్స్ ఇలా వచ్చిన ప్రతి అవకాశాన్ని సద్వినియోగం చేసుకున్నాడు. ఇక పెద్ద సినిమాల ప్రీ రిలీజ్ ఈవెంట్లలో తెలంగాణ బుర్ర కథలతో మరింత పేరు తెచ్చుకున్నాడు.   అలా తన ప్రస్థానాన్ని సాగిస్తున్నాడు వేణు.

టాలీవుడ్ బడా ప్రొడ్యూసర్ దిల్ రాజును మెప్పించి బలగం అనే  సినిమాను తీసి సూపర్ హిట్టు కొట్టాడు. పెద్దగా స్టార్లు లేని ఈ సినిమా ఇందులో నటించిన ప్రతి ఒక్కరికీ గుర్తింపు తెచ్చి పెట్టింది.
ఇందులో నటించిన కొత్త వాళ్లకు వారి పేరు బలగం ఫేమ్ అనేంతగా మారిపోయింది. అంత  గొప్ప చిత్రాన్ని తీసిన దర్శకుడు వేణు మళ్లీ మెగాఫోన్ పట్టలేకపోతున్నాడు. ఇప్పటికే తన వద్ద ఉన్న కథను ఇద్దరు ముగ్గురు హీరోలకు వినిపించినా ఎటు కాకుండా పోతున్నాడు.

చేతిలో నిర్మాత.. కానీ హీరోనే చిక్కక..

బలగం లో బడ్జెట్ సినిమా. పెట్టిన ఖర్చుకు పదింతలు లాభం తెచ్చి పెట్టడంతో పాటు నిర్మాతగా దిల్ రాజుకు మరింత మంచి పేరు తెచ్చి పెట్టింది. పెద్ద సినిమాలు తీసుకు రాలేని లాభాలు ఒక చిన్న సినిమా సాధించి పెట్టింది. దీంతో నిర్మాత దిల్ రాజు మరో సినిమా చేసుకో అంటూ అవకాశం ఇచ్చాడు.  కానీ హీరోనే దొరకడం లేదు. బలగం సినిమా చూసిన వారంతా ఇంప్రెస్ అయ్యారు. మెగాస్టార్ చిరంజీవి సైతం తెలంగాణలోని కుటుంబ అనుబంధాలు, పట్టింపులు ఎలా ఉంటాయో చూసి మెచ్చుకోలేకుండా ఉండలేకపోయాడు .అటు రాజకీయ నాయకులు సైతం తమ ఊళ్లల్లో స్పెషల్ వేయించారంటే ఈ సినిమా ఎంతలా ప్రభావం చూపిందో అర్థం చేసుకోవచ్చు.  ఇంత పేరు తెచ్చుకున్న వేణు మరో సినిమా పట్టాలెక్కించడానికి తంటాలు పడుతున్నాడు.

నాని, నితిన్, విశ్వక్ సేన్..

దసరా సినిమా తర్వాత నాని వేణుతో సినిమా చేసేందుకు సిద్ధమయ్యాడు. దీనికి ఎల్లమ్మ అనే టైటిల్ కూడా అనుకున్నారు. ముందు కథను ఓకే చేసిన నాని ఆ తర్వాత  ఆ స్టోరీ వద్దంటూ వేణుకు చెప్పేశాడు. నాని ప్రస్తుతం కొత్త సినిమా సరిపోదా శనివారం ఈ నెల 29న విడుదల కానుంది. దసరా సినిమా డైరెక్టర్  శ్రీకాంత్ ఓదెలతో మరో సినిమా చేస్తున్నాడు.  నాని కాదనంతో హీరో నితిన్ తో పాటు విశ్వక్ సేన్ ను సంప్రదించాడు. నితిన్ ఇప్పటికే కమిట్ అయిన సినిమాలు పూర్తి చేయాల్సి ఉంది. ఇక విశ్వక్ సేన్ డైరీ కూడా ఇప్పట్లో ఖాళీ లేదు. నాలుగు సినిమాలను లైన్ లో పెట్టాడు విశ్వక్ సేన్. అవి పూర్తయితే తప్ప మరో సినిమా కు కమిట్ కాలేని పరిస్థితి విశ్వక్ ది.

బ‌ల‌గం వంటి హిట్ త‌ర్వాత వేణు మరోసారి మెగాఫోన్ పట్టడానికి చాలా రోజులుగా నిరీక్షిస్తున్నాడు. పెద్ద నిర్మాత గో హెడ్ అంటున్నా హీరో దొరక్క సతమతవుతున్నాడు వేణు.  ఈ ద్వితీయ విఘ్నం ఎప్పుడు దాటుతాడో, ఏ హీరోతో జత కడతాడో చూడాల్సిందే.