PM Modi : ఈ నెల 8 నుంచి పీఎం మోదీ రష్యా, ఆస్ట్రియా దేశాల్లో పర్యటన

PM Modi

PM Modi : ప్రధాని నరేంద్ర మోదీ ఈ నెల 8, 9, 10వ తేదీల్లో రష్యా, ఆస్ట్రియా దేశాల్లో పర్యటించనున్నారు. పీఎం మోదీ రష్యా పర్యటన ఖరారైందని, 8 నుంచి 10వ తేదీ వరకు రష్యాతో పాటు ఆస్ట్రియాలో అధికారిక పర్యటన చేస్తారని భారత విదేశాంగ శాఖ ప్రకటించింది. ఉక్రెయిన్ పై రష్యా దండయాత్ర తర్వాత మాస్కోను మోదీ సందర్శించనుండటం ఇదే మొదటిసారి. అదేవిధంగా, భారత ప్రధాని ఆస్ట్రియాకు వెళ్లడం 41 ఏళ్లలో ఇదే ప్రథమం. ఈ పర్యటనలో 22వ భారత్-రష్యా వార్షిక శిఖరాగ్ర సమావేశంలో మోదీ పాల్గొంటారు. ఇరు దేశాల మధ్య సంబంధాలను నేతలిద్దరూ సమీక్షిస్తారని, ప్రాంతీయ, ప్రపంచ అంశాలపై చర్చలు జరుపుతారని విదేశాంగ శాఖ ప్రకటనలో తెలిపింది.

ప్రధాని మోదీ ఇంతకు మునుపు 2019లో రష్యాలో జరిగిన ఆర్థిక సదస్సుకు హాజరయ్యారు. వ్యూహాత్మక భాగస్వామ్యంలో భాగంగా ఇప్పటి వరకు రష్యా, భారత్ ల నడుమ 21 సార్లు వార్షిక భేటీలు జరిగాయి. చివరిసారిగా 2021 డిసెంబరులో ఢిల్లీ వేదికగా పుతిన్ ఈ చర్చల్లో పాల్గొన్నారు. మూడేళ్ల విరామం అనంతరం 22వ వార్షిక సమావేశం జరుగనుంది. ఈ క్రమంలోనే ఉక్రెయిన్ పై యుద్ధాన్ని ముగించే విషయాన్ని కూడా పుతిన్ తో మోదీ చర్చించే అవకాశం ఉన్నట్లు భావిస్తున్నారు.