PM Modi : మోడీ నోటి నుంచి మరో సారి నల్లధనం మాట..

PM Modi

PM Modi : ప్రధాని నరేంద్ర మోడీ మరోసారి సంచలన వ్యాఖ్యలు చేశారు. అవినీతి వ్యాపారులు, రాజకీయ నాయకులు దాచుకున్న నల్లధనంను వెలికి తీస్తానన్నారు. అవినీతి పరులను వదిలిపెట్టేది లేదన్నారు. దేశంలో స్వేచ్ఛగా తిరుగుతున్న వారికి తగిన బుద్ధి చెప్తామన్నారు.

సార్వత్రిక ఎన్నికల ఆరో దశ పోలింగ్ మే 25న జరగనున్న పశ్చిమ బెంగాల్‌లోని పురుల్లియాలో జరిగిన బహిరంగ సభలో మోడీ ప్రసంగించారు. అవినీతికి పాల్పడిన వారిపై కేసులు నమోదు చేసి జైలుకు వెళ్లేలా చూస్తామని మోదీ చెప్పారు. ‘ఇది నా హామీ’ అని చెప్పారు.

కౌంటింగ్ పూర్తయ్యే జూన్ 4వ తేదీ తర్వాత బీజేపీ నేతృత్వంలోని ఎన్డీయే మళ్లీ కేంద్రంలో ప్రభుత్వాన్ని ఏర్పాటు చేస్తుందని ఆయన ధీమా వ్యక్తం చేశారు. అలాంటప్పుడు అవినీతిపరులంతా జీవితాంతం జైళ్లలోనే గడపాల్సి వస్తుందన్నారు.

అవినీతిపరులు స్కాట్‌ఫ్రీగా ఉండరని హామీ ఇస్తున్నానని మోడీ చెప్పినప్పటికీ, గత ఎన్నికల సమయంలో ఎంఎస్‌పీని చట్టబద్ధం చేయడం, దళితులపై అఘాయిత్యాలను అరికట్టడం వంటి మరికొన్ని అమలు చేయని వాగ్ధానాలపై విమర్శలు వచ్చాయి.

తృణమూల్ కాంగ్రెస్ చేసిన వాగ్ధానాలకు, ఆ పార్టీ చర్యలకు మధ్య ఉన్న వైరుధ్యాల గురించి కూడా ప్రధాని మాట్లాడారు, ముఖ్యంగా నీటి కొరత, రిజర్వేషన్లు, అవినీతి వంటి అంశాలను ఎత్తిచూపారు.

రిజర్వేషన్లపై, దళితులు, బీసీలు మరియు గిరిజనుల హక్కులను అణగదొక్కేందుకు I.N.D.I.A కూటమి ప్రయత్నిస్తోందని మోడీ ఆరోపించారు. దళితులు, వెనుకబడిన తరగతులు, గిరిజనులకు ఇచ్చిన రిజర్వేషన్లను TMC, దాని మిత్రపక్షాలు తొలగించాలనుకుంటున్నాయి’ అని ఆయన నొక్కి చెప్పారు.