Ustad Bhagat Singh : ‘గాజు పగిలేకొద్ది పదునెక్కుద్ది..’’ ఉస్తాద్ భగత్ సింగ్ టీజర్.. జనసైనికులకు ఫుల్ జోష్

Ustad Bhagat Singh Teaser

Ustad Bhagat Singh : పవర్ స్టార్ పవన్ కల్యాణ్ ఉస్తాద్ భగత్ సింగ్ టీజర్ వచ్చేసింది. ఇలా వచ్చిందో తెలుగు స్టేట్స్ ను షేక్ చేసేస్తోంది. హరీశ్ శంకర్ దర్శకత్వంలో వస్తున్న ఈ చిత్రంపై భారీ అంచనాలు ఉన్నాయి. పవన్ ఫ్యాన్స్ ఈ సినిమా కోసం కళ్లలో వొత్తులు వేసుకుని మరీ ఎదురుచూస్తున్నారు. ఎన్నో అంచనాలు, ఆశల మధ్య నేడు(మార్చి 19) స్పెషల్ టీజర్ వచ్చేసింది.

భగత్ బ్లేజ్ అంటూ ఉస్తాద్ భగత్ సింగ్ టీజర్ ను మూవీ టీం తీసుకొచ్చింది. ఈ సినిమాలో భగత్ సింగ్ అనే పవర్ ఫుల్ పోలీస్ క్యారెక్టర్ చేస్తున్నారు పవన్. ఈ టీజర్ లో పవన్ యాక్షన్, లుక్, స్వాగ్ డైలాగ్స్ అదిరిపోయాయి. తన రాజకీయ పార్టీ జనసేన ఎన్నికల గుర్తు ‘గాజు గ్లాస్’ను హైలెట్ చేస్తూ టీజర్ లో డైలాగులు పొందుపరిచారు.

ఓ ఆలయం వద్ద ఉత్సవం జరుగుతుంటే.. అక్కడ రౌడీలు విధ్వంసం చేస్తున్న సీన్ తో భగత్ సింగ్ బ్లేజ్ టీజర్ మొదలైంది. అక్కడికి వచ్చి రౌడీలను చితకబాదుతారు పవన్. గాజు గ్లాసు చూపిస్తూ ‘నీ రేంజ్ ఇదీ’ అంటూ విలన్ దాన్ని పగులగొడుతాడు. అయితే ‘గాజు పగిలేకొద్ది పదునెక్కుద్ది’’ అంటూ పవర్ ఫుల్ డైలాగ్ చెబుతారు. అంటే 2019 ఎన్నికల్లో ఓటమి నుంచి తాము మరింత రాటుదేలినట్టు చెప్పుకునేలా ఉంది.

ఇంకా ‘‘కచ్చితంగా గుర్తు పెట్టుకో..గ్లాస్ అంటే సైజ్ కాదు.. సైన్యం.. కనిపించని సైన్యం’’ అనే డైలాగ్ వేరే లెవల్ లో ఉంది. మొత్తానికి జనసైనికులకు ఫుల్ జోష్ తెప్పించేలా టీజర్ సాగింది. జనసేన ఎన్నికల గుర్తు చుట్టూ డైలాగులు పేలడంతో పొలిటికల్ హీట్ పెంచడం ఖాయం. ఇక దేవిశ్రీ ప్రసాద్ బ్యాక్ గ్రౌండ్ మ్యూజిక్ అద్దిరిపోయిందనే చెప్పాలి.